बीरगंज २९ साउन ।
बीरगंजबाट पर्सा प्रहरीले ५ थान चोरीको मोटर साईकल सहित ३ जनालाई पक्राउ गरेको छ । जिल्ला प्रहरी कार्यालय पर्साबाट खटिएको टोलीले बीरगञ्ज महानगरपालिका वडा नम्बर ३० लालपर्सा प्रसोतिपुरमा छापामारी चोरीको मोटर साईकल बिक्री गर्ने मनसायले आफ्नै घर अगाडीको खाली जग्गा लुकाई छिपाई राखेको अवस्थामा स्थानिय २० बर्षिय आकाश यादव र २१ बर्षिय कृष्ण पटेललाई पक्राउ गरेको छ । अभियुक्तहरुले बा ४२ प ५२६३ नम्बर, ना १६ प ३३६७ नम्बरको पल्सर मोटर साईकल, ना १४ प ८४ नम्बरको प्यासन प्रो र ग १ प ७८९४ नम्बरको आरएक्स यामाहा मोटरसाईकल चोरी गरी लुकाई राखेको अवस्थामा प्रहरीले बरामद गरेको जिल्ला प्रहरी कार्यालय पर्साका प्रहरी नायव उपरीक्षक ओम प्रकाश खनालले बताउनु भयो । अभियुक्तहरुलाई चोरी सम्बन्धी कसुरमा थप अनुसन्धान अगाडी बढाईएको खनालले बताउनु भयो । यसैगरी पर्सा प्रहरीले आज विहान मोटर साईकलको लक फुटाई चोरी गरि रहेको अवस्थामा एक युवकलाई रंगेहात पक्राउ गरेको छ । बीरगञ्ज महानगरपालिका वडा नम्बर २५ सिर्सिया निवासी कामेश्वर पटेलको ना.३५ प ४३६२ नम्बरको पल्सर मोटर साईकल आफ्नै घर अगाडि पार्क गरी राखेकोमा पर्सा जिल्ला पोखरिया नगरपालिका वडा नम्बर ६ रानीगंज निवासी २० बर्षिय रहमान आलमले लक फुटाई चोरी गर्न खोज्दै गरेको अवस्थामा सवारी धनी थाहा पाई तत्काल प्रहरीमा खबर गरेपश्चात प्रहरी चौकी सिर्सियाबाट खटिएको टोलीले मोटरसाईकल सहित आलमलाई नियन्त्रणमा लिएको जिल्ला प्रहरी कार्यालय पर्साका प्रवक्ता ओम प्रकाश खनालले बताउनु भयो । आलम विरुद्ध पनि चोरी सम्बन्धी कसूरमा अनुसन्धान प्रकृया अगाडि बढाइएको छ ।