वीरगञ्ज २१ असोज ।
हेटौडाबाट वीरगंज आउदै गरेको मिनी ट्रकबाट बारा प्रहरीले आज १ सय ४७ किलो ग्राम अवैध लागु औषध गाँजा बरामद गरेको छ । हेटौडाबाट वीरगञ्जतर्फ आउँदै गरेको ना ७ ख ९५५४ नम्बरको मिनी ट्रकको पछाडि ७ वटा पोकामा राखिएको १ सय ४७ किलो ग्राम गाँजा बरामद भएको जिल्ला प्रहरी कार्यालय बाराले जनाएको छ । इलाका प्रहरी कार्यालय जीतपुरले कार्यालय अगाडि चेकजाँच गर्ने क्रममा ३ वटा ट्रकको पछाडि रहेको मिनी ट्रकमा चालक र अन्य व्यक्ति फेला नपरेपछि ट्रक चेकजाँच गर्दा लुकाएर राखिएको अवस्थामा ७ पोका गाँजा बरामद भएको जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिनुभयो । ठूलो परिमाणमा रहेको अवैध लागु औषध गाँजा कसले कहाँबाट ल्याएको हो र कहाँ लैजान लागिएको हो ? केही खुल्न नसकेको र प्रहरीले ट्रकका मालिक तथा चालकको खोजी गरिरहेको बारा प्रहरीका प्रवक्ता मिश्रले बताउनुभयो । गाँजासहितको ट्रकलाई जिल्ला प्रहरी कार्यालय बारामा राखिएको छ ।