वीरगंज २८ माघ ।
प्रहरीले बीरगंज महानगरपालिका वडा नम्बर १५ प्रतिमा चोकमा पार्किङ्ग गरि राखिएको ट्रकबाट ब्याट्री चोर्दै गरेको अवस्थामा गएराती एक जनालाई पक्राउ गरेको छ । वडा प्रहरी कार्यालय श्रीपुरबाट खटिएको प्रहरी टोलीले सडक छेउमा पार्किङ्ग गरिएको ना ३ ख ९३५७ नम्बरको ट्रकको ब्याट्री चोरी गरेर लैजादै गरेको अवस्थामा राति ११ बजे बीरगंज महानगरपालिका वडा नम्बर १५ भेडियाही निवासी निरंजन सिंह राजपुतलाई पक्राउ गरेको हो । ट्रकबाट चोरी गरेको ब्याट्री ना २ ह ६९०७ नम्बरको अटोमा लोड गरी लैजादै गरेको सिंहलाई रंगेहात पक्राउ गरिएको जिल्ला प्रहरी कार्यालय पर्साका प्रवक्ता डिएसपी मनोजित कुवँरले जानकारी दिनु भयो । पक्राउ परेका सिंहलाई जिल्ला प्रहरी कार्यालयको हिरासतमा राखी चोरी मुद्दामा थप अनुसन्धान सुरु गरिएको उहाले जानकारी दिनु भयो । बीरगंजमा सडकमा पार्किङ्ग गरि राखिएका सवारी साधनबाट ब्याट्री चोरी हुने क्रम बढेपछि प्रहरीले निगरानी बढाएको थियो ।