पर्सा, पोखरिया –
जिल्ला पर्सा पोखरिया नगरपालिका वडा नं.६ श्रीसिया निवासी शंकर प्रसाद महतो चाईको छोरा, ३३ वर्षीय धर्मेन्द्र प्रसाद चौहान र वडा नं.५ सतवरिया निवासी सुभाष प्रसाद चौहानकी छोरी निषा कुमारी चौहानबीच २०७६ सालको बैशाख ४ गते सामाजिक परम्परा अनुसार विवाह सम्पन्न भएको थियो। विवाहको समयमा वधू पक्षले बेहुली बिदाइ गर्न नमानेपछि दुई पक्षका आफन्तबीच मनमुटाव उत्पन्न भएको थियो।
यसै विवादलाई लिएर मिति २०७९ साल बैशाख ९ गते दिउँसो २ बजे पोखरिया नगरपालिका वडा नं.४ स्थित वालउधान अंग्रेजी बोर्डिङ स्कूलको प्राङ्गणमा दुई पक्षबीच झगडा भएको थियो। झगडाका क्रममा बेहुला पक्षका शंकर प्रसाद महतो चाईको टाउकोमा गम्भीर चोट लागेपछि काठमाण्डौस्थित सहिद गंगालाल अस्पतालमा उपचारको क्रममा २०७९ साल असार ११ गते मृत्यु भएको थियो।
पीडित पक्षले दिएको जाहेरीको आधारमा जिल्ला प्रहरी कार्यालय पर्साले घटनामा संलग्न आरोपितहरूलाई खोजतलास गर्दै आएकोमा करिब ३ वर्षपछि, २०८२ साल बैशाख २२ गते फरार अभियुक्तमध्ये एकजनालाई वडा नं.५ सतवरियाबाट पक्राउ गरिएको जनाएको छ। पक्राउ परेका अभियुक्तलाई पर्सा जिल्ला अदालतबाट ७ दिनको म्याद थप गराई ज्यानसम्बन्धी कसुरमा थप अनुसन्धान भइरहेको पर्सा प्रहरीका प्रवक्ता तथा सूचना अधिकारी किशोर लमसालले जानकारी दिनुभयो ।