वीरगञ्ज, बैशाख २३ –
विश्वभर बढ्दै गइरहेको दम (आस्थमा) रोगप्रति जनचेतना फैलाउने उद्देश्यले पर्सा जिल्लास्थित नेशनल मेडिकल कलेज शिक्षण अस्पताल, वीरगञ्जले आज विशेष जनस्वास्थ्य कार्यक्रम सम्पन्न गरेको छ।

कार्यक्रममार्फत दम रोगका कारणहरू, यसको रोकथाम तथा उपचार सम्बन्धी सन्देश प्रवाह गर्न पोस्टर र व्यानर प्रदर्शनी गरिनुका साथै विभिन्न जनचेतनामूलक गतिविधिहरू सञ्चालन गरिएका थिए।

नेशनल मेडिकल कलेजका प्रेस सल्लाहकार आसिक अन्सारीका अनुसार, कार्यक्रमको मुख्य उद्देश्य रोगको उपचार मात्र नभई रोग हुन नदिन पूर्वसचेतना फैलाउनु हो।

कार्यक्रममा अस्पतालका वरिष्ठ चिकित्सक डा. सुधाकर झा द्वारा दमका बिरामीको निःशुल्क चेकजाँच गरिएको थियो भने रगत परीक्षण सेवामा १५ प्रतिशत छुट प्रदान गरिएको थियो। साथै दम रोग नियन्त्रणमा उपयोगी इनहेलर औषधिहरू निःशुल्क वितरण गरिएको थियो।

दम रोगबारे जनमानसमा रुचि बढाउनका लागि ‘श्वास प्रश्वास गेम’ समेत आयोजना गरिएको थियो। दमका बिरामीलाई स्वास्थ्यप्रद खानपानको सन्देश दिन फलफूलसमेत वितरण गरिएको थियो।

कार्यक्रमको विशेष आकर्षण सखुवा प्रसौनी गाउँपालिका–५, देरबनाका १०२ वर्षीया वृद्धा महलुदन खातुनको निःशुल्क स्वास्थ्य परीक्षण रह्यो।

कार्यक्रम चेरिटेबल सोसाइटीका नर्सिङ समूहका विद्यार्थीहरूको सहयोगमा सम्पन्न भएको हो।

कार्यक्रममा नेशनल मेडिकल कलेजका मार्केटिङ तथा एडमिशन डाइरेक्टर आविद हुसेन अन्सारी, अस्पताल निर्देशक इसरत जहाँ अन्सारी, कलेज निर्देशक रुबि श्रेष्ठ, यासमिनलगायतको उपस्थिति रहेको थियो।