पर्सा १७ असार ।

मानव बेचबिखन तथा जबरजस्ती बेश्यावृत्तिमा संलग्न एक जना पुरुषलाई प्रहरीले पक्रिएको छ। जिल्ला प्रहरी कार्यालय पर्साले दिएको जानकारी अनुसार, मिति २०८२ साल असार १६ गते दिउँसो करिब १२:३० बजेको समयमा भारतबाट वीरगञ्ज आएका दुई जना महिलालाई विभिन्न प्रलोभन देखाई बेश्यावृत्तिमा संलग्न गराउने कार्यमा संलग्न एक युवकलाई पक्राउ गरिएको हो।
भारतबाट आएका ती दुई जना पीडित महिलालाई खाना खुवाउने र पैसा दिने बहानामा वीरगञ्ज महानगरपालिका वडा नं.१५ भिष्वा क्षेत्रका विभिन्न होटल तथा लजहरूमा जबरजस्ती बेश्यावृत्तिमा लगाउने गरिएको प्रारम्भिक अनुसन्धानबाट खुल्न आएको छ। प्रहरीले विश्वसनीय सूचनाका आधारमा तत्कालै अपरेसन चलाउँदै ती दुवै पीडित महिलालाई सकुशल उद्दार गरेको छ।
उक्त आपराधिक कार्यमा संलग्न बारा जिल्ला, कलैया उपमहानगरपालिका वडा नं.१२ बस्ने २९ वर्षीय पवन कुमार साह लाई पक्राउ गरी नियन्त्रणमा लिएको हो। हाल पर्सा जिल्ला अदालतबाट ५ दिनको म्याद थप लिई उक्त घटनामा थप अनुसन्धान भइरहेको जिल्ला प्रहरी कार्यालय पर्साले जनाएको छ।
प्रहरीका अनुसार, पक्राउ परेका साहले पीडित महिलाहरूलाई बेश्यावृत्तिमा लगाएर आएको रकम आफैं राख्ने गरेको समेत खुलेको छ। पीडित महिलाहरूले आफ्ना नामथर परिवर्तन गरेका कारण उनीहरूको सही विवरण गोप्य राखिएको छ।
प्रहरीले मानव बेचबिखन तथा ओसारपसारसम्बन्धी गम्भीर अपराधमा संलग्नलाई कारवाही प्रक्रिया अगाडि बढाइरहेको छ।