वीरगञ्ज, २० साउन ।
बिरगंजको नारायणी अस्पतालमा उपचार गराउन आएका कुरुवामाथी अस्पतालका कर्मचारी र प्रहरीले दुव्र्यवहार गरेको छ । कलैया उपमहानगरपालिका–८ बरेवाका असलम अन्सारी नारायणी अस्पताल, वीरगञ्जमा आफ्ना बिरामी छोराको उपचारका लागि चार दिनदेखि अस्पतालमै बसेर सेवा गर्दै आइरहेका छन्। तर, मंगलबार दिउँसो परिवारसहित खाना खाइरहेका असलमलाई अस्पतालका गार्डले ‘यहाँ खाना खान पाइँदैन’ भन्दै उठ्न निर्देशन दिएपछि अप्रत्याशित विवादको सुरुवात भयो।
अन्सारीले “पाँच मिनेटमा खाना सकिन्छ, सफा पनि गरिदिन्छौं” भन्दै विनम्र आग्रह गरे पनि गार्डले प्रहरी बोलाए। ड्युटीमा रहेका प्रहरी आएर असलम र उनको परिवारसँग तछाडमछाड गर्न थाले र उनका छोराले चलाइरहेको मोबाइल समेत खोस्न खोजे। यत्तिकैमा विवाद बढ्दै गएपछि थप प्रहरी बल आएर असलमलाई जबरजस्ती नियन्त्रणमा लिने प्रयास गरियो।
सो घटनाको भिडियो अहिले सामाजिक सञ्जालमा भाइरल भइरहेको छ जसमा अस्पताल प्रशासन र सुरक्षाकर्मीको अत्यधिक दम्भ र अव्यवसायिक व्यवहार स्पष्ट देखिन्छ। अस्पताल परिसरमा शान्तिपूर्वक बसेर खानासमेत खान नपाउनु, त्यसलाई इगोको विषय बनाउँदै प्रहरी हस्तक्षेप हुनु मानवता र संवेदनशीलताको घोर अपमान भएको पीडित पक्षको गुनासो छ।
सामान्य बुझाइ, धैर्य र मानविय व्यवहार अपनाएको भए विवाद टार्न सकिन्थ्यो भन्ने आम जनधारणा रहेको छ। अस्पताल जहाँ पीडितहरू उपचारको आशामा पुग्छन्, त्यहाँ यस्तो व्यवहार हुनु अत्यन्त निन्दनीय विषय हो।