बिरगंज २२ फागुन ।
बिरगंज एकीकृत जाँच चौकी (आई.सी.पी.) भित्र सुरक्षा व्यवस्थाको लापरवाहीका कारण अज्ञात चोरहरूले गाडीबाट २ थान ब्याट्री र डिजेल चोरी गरेका छन्। आई.सी.पी. व्यवस्थापनले प्रत्येक गाडीबाट दैनिक करिब ९०० रुपैयाँ पार्किङ शुल्क लिँदै आएको छ, तर सुरक्षा उपायमा ध्यान नदिएकाले चोरीजस्ता घटनाहरू भइरहेका छन्।

पीडित पक्षका अनुसार, पार्किङ भित्रै गाडी सुरक्षित रहन्छ भन्ने आशामा शुल्क तिरेर गाडी राखिए पनि सुरक्षा व्यवस्था कमजोर भएकाले चोरीको जोखिम उच्च छ। विशेषगरी, आई.सी.पी. जस्तो महत्वपूर्ण स्थानमा सीसीटीभी क्यामेरा समेत नहुनु र सुरक्षाकर्मीको उपस्थिति प्रभावकारी नहुनुले ठूलो प्रश्न उठाएको छ।

व्यापारीहरू र यातायात व्यवसायीहरूले आई.सी.पी. भित्र सुरक्षा अभावले चोरहरूलाई फाइदा पुगेको बताउँदै आएका छन्। पार्किङ क्षेत्रमा भएका चोरीका घटनाहरू सम्बन्धित निकायले गम्भीर रूपमा नलिएको गुनासो छ। गाडीधनीहरूले उच्च शुल्क तिर्दा पनि सुरक्षित सेवा नपाउनु अन्यायपूर्ण भएको उनीहरूको भनाइ छ।

यस घटनापछि आई.सी.पी. व्यवस्थापनको भूमिकामाथि प्रश्न उठेको छ। पार्किङ शुल्क तिर्न बाध्य पारिएका व्यवसायी र यातायात व्यवसायीहरूले सुरक्षा मजबुत बनाउन माग गरेका छन्। चोरीका घटनाहरू रोक्न सीसीटीभी जडान, सुरक्षा गार्डको संख्या वृद्धि र कडा निगरानी जस्ता आवश्यक उपाय तत्काल लागू गर्नुपर्ने उनीहरूको आग्रह छ।

सुरक्षा संवेदनशील स्थानमा यस्ता चोरीका घटनाहरू दोहोरिन नदिन सम्बन्धित निकायले शीघ्र कदम चाल्नुपर्ने आवश्यक छ। अन्यथा, यातायात व्यवसायी र व्यापारीहरू आन्दोलन गर्न बाध्य हुने चेतावनी दिएका छन्।