वीरगञ्ज, २२ फागुन ः वीरगञ्ज ड्राईपोर्ट एरियाबाट अहिले व्यापक रुपमा तस्करी सुरु भएको छ । सशस्त्र प्रहरी ड्राईपोर्टका सशस्त्र प्रहरी निरीक्षक दिपेन्द्र मल्लको नेतृत्वमा अहिले तस्करी भइरहेको सूचना प्राप्त भएको छ ।
वीरगञ्ज महानगरपालिकाको श्रीसिया, खल्वाटोला, अलौं, ड्राइपोर्ट क्षेत्रबाट एक दर्जन भन्दा बढी तस्करहरुले प्रनि मल्ललाई महिनावारी बुझाएर राजस्व चुहावट गर्ने गरेका छन् । नेपाल सरकारले राजस्व चुहावट नियन्त्रण गर्न भन्सार क्षेत्रमा सशस्त्र प्रहरीलाई जिम्मा दिएपनि उनीहरुले राज्यलाई हरिकंगाल गर्ने प्रपञ्च रच्ने गरेका छन् ।
सिमावर्ती शहर रक्सौलबाट तस्करहरुले भारतीय सटिङ सुटिङका कपडा, हार्डवयर, इलोक्ट्रोनिक्स्का पार्टसहरु, ड्राइफुड्स, खाद्यान्न लगायतका सामानहरु सिमानाकामा खटेका सशस्त्र प्रहरीको मिलोमतोमा अलौं, ड्राइपोर्ट, सिवान टोला, खल्वाटोलाको नाकाबाट निर्वाध रुपमा नेपाल भित्र्याइरहेका छन् ।
प्रनि मल्लले आफ्नो विश्वासपात्र शैलेन्द्र यादवलाई घुमुवाको रुपमा परिचालित गरेका छन् । शैलेन्द्रले नै त्यस एरियाबाट तस्करी गर्ने तस्करहरुसँग प्रनि मल्ललाई महिनावारी नबुझाए सम्म कुनैपनि अवैध गतिविधि नहुने बताए ।
सशस्त्र प्रहरी महानिरीक्षक राजु अर्यालको कडा निर्देशन विपरित प्रनि मल्लले संगठन हित विपरित कार्यहरु गरिरहेको आम जनमानसमा उजागर भएको छ । यसले गर्दा सम्बन्धि निकाय र सम्बन्धि संगठनको पनि वेइज्जत हुन पुगेको समाचार छ ।