बिरगंज १७ चैत । इस्लाम धर्मावलम्बीहरूले आज इद उल-फित्र पर्व उत्साहका साथ मनाइरहेका छन्। रमजान महिनाभर निरन्तर उपवास (रोजा) बसेपछि आउने यो पर्वलाई मुस्लिम समुदायले आस्था, खुशी र सामाजिक सद्भावको रूपमा मनाउँछन्।
इद उल-फित्र इस्लामिक पात्रोअनुसार शव्वाल महिनाको पहिलो दिन मनाइन्छ। यस अवसरमा बिहान विशेष नमाज अदा गर्ने, गरिब तथा असहायलाई जकात र फित्रा वितरण गर्ने, मीठा परिकार बनाएर पारिवारिक जमघट गर्ने परम्परा रहँदै आएको छ।
यस पर्वले आत्मसंयम, परोपकार, दया, र भाइचाराको सन्देश बोकेको हुन्छ। इदको दिन नयाँ कपडा लगाउने, आपसी मेलमिलाप गर्ने र शुभकामना साटासाट गर्दै आपसी प्रेम बढाउने परम्परा रहेको छ।
मुस्लिम समुदायका लागि इद केवल एउटा पर्व मात्र नभई सामाजिक एकता, धार्मिक निष्ठा र परोपकारको प्रतीक पनि हो। यो पर्वले सबैलाई एकअर्कासँग प्रेम र सद्भावको भावनाले बाँध्न मद्दत गर्छ।