काठमाडौं — जनता समाजवादी पार्टी (जसपा) नेपालका अध्यक्ष उपेन्द्र यादवले सरकारले ल्याएको भूमि सम्बन्धी विधेयकको कडा विरोध गरेका छन्। यादवले सामाजिक सञ्जालमार्फत उक्त विधेयक भूमाफिया र निजी स्वार्थ समूहलाई लाभ हुने गरी ल्याइएको भन्दै सडक र सदन दुवै मोर्चाबाट सशक्त रूपमा विरोध गर्ने चेतावनी दिएका हुन्।
फेसबुकमा लेख्दै यादवले भनेका छन्, “भूमी सम्बन्धि अध्यादेश देश र जनताको हितमै थिएन, त्यसैले हामीले विरोध गरेका थियौं। अहिले फेरि वन र भूमि सक्ने खालका भूमाफियाको स्वार्थ अनुकूल हुनेगरी तिनै प्रावधान राखेर सरकारले भूमि सम्बन्धी विधेयक ल्याएको छ। हामी सडक र सदन दुवै मोर्चाबाट सशक्त विरोध गर्छौं।”
यादवको भनाइ अनुसार, यस विधेयकले सार्वजनिक जग्गा, वन क्षेत्र, तथा सामूहिक स्वामित्वमा रहेका भूमिहरूलाई निजीकरण गर्ने बाटो खोल्नेछ, जसले दीर्घकालीन रूपमा सामाजिक असमानता, वातावरणीय विनाश र सशक्तिकरणमा अवरोध ल्याउनेछ।

विधेयकको विरोधमा सर्वसाधारण, वातावरणविद् तथा विभिन्न राजनीतिक दलहरू समेत उत्रन थालेका छन्। विश्लेषकहरूको धारणा छ कि विधेयकले भूमिको न्यायपूर्ण वितरणभन्दा पनि मुठ्ठीभर व्यक्तिको स्वार्थ पूरा गर्ने उद्देश्य बोकेको देखिन्छ।
यादवले चेतावनी दिँदै भनेका छन्, “सरकारले जनचासोको बेवास्ता गर्दै विधेयक अगाडि बढाउने हो भने आन्दोलन अपरिहार्य हुनेछ।”
विपक्षी दलहरू समेत यो विधेयकप्रति गम्भीर आपत्ति जनाइरहेका छन्। अबको दिनमा संसद भित्र र बाहिर दुवै स्थानमा भूमि विधेयक प्रमुख राजनीतिक बहसको विषय बन्ने देखिएको छ।