पर्सा, १८ जेठ । वीरगञ्ज महानगरपालिकाका दुई छुट्टाछुट्टै स्थानबाट चोरी भएका मोटरसाइकलसहित दुई जनालाई प्रहरीले पक्राउ गरेको छ।
प्रहरीका अनुसार, गत वैशाख २३ गते बिहान ४:०० बजे वीरगञ्ज–१३, मुर्ली नयाँ टोलस्थित सारजा खातुनको घरअगाडि पार्किङ गरी राखिएको मधेश प्रदेश–०३–०२७ प ५५५५ नम्बरको १६० सिसीको एनएस मोटरसाइकल चोरी भएको थियो। चेसिस नं. MD2B54DX4NCE80300 र इन्जिन नं. PDXCNE75869 रहेको उक्त मोटरसाइकल चोरी भएको पीडितको जाहेरीका आधारमा जिल्ला प्रहरी कार्यालय पर्साबाट खटिएको टोलीले अनुसन्धान सुरु गरेको थियो।
अनुसन्धानको क्रममा मिति २०८२ जेठ १६ गते सर्लाहीको कबिलासी नगरपालिका–४ बस्ने वर्ष २१ का राधेश्याम यादवलाई चोरी गरिएको मोटरसाइकलसहित नियन्त्रणमा लिइएको हो। यादवविरुद्ध चोरी सम्बन्धी कसूरमा पर्सा जिल्ला अदालतबाट पाँच दिनको म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साले जनाएको छ।
यसैबीच, अर्को घटनामा मिति २०८२ साल जेठ १७ गते अपराह्न ४:३० बजे वीरगञ्ज–४, अमरचोकस्थित प्रमोद प्रसाद साहको नाममा दर्ता रहेको प्रदेश २–०३–०२२ प २७७६ नम्बरको १५० सिसीको कालो–रातो पल्सर मोटरसाइकल चोरी गर्न खोजिरहेको अवस्थामा बारा बारागढी गाउँपालिका–१ का वर्ष २५ का रूपेश चौधरीलाई वडा प्रहरी कार्यालय विर्ताबाट खटिएको टोलीले रंगेहात पक्राउ गरेको हो।
चोरीमा संलग्न रहेको आरोपमा चौधरीलाई पनि जिल्ला प्रहरी कार्यालय पर्सामा ल्याइएको छ। उहाँविरुद्ध पनि चोरी कसूरमा पर्सा जिल्ला अदालतबाट पाँच दिनको म्याद थप लिई थप अनुसन्धान भइरहेको प्रवक्ता तथा सूचना अधिकारी प्रनाउ किशोर लम्सालले जानकारी दिनुभयो।