वीरगन्ज १८ जेठ । नेपालको दोस्रो ठूलो खेलकुद संरचना मानिने नारायणी रंगशाला लामो समयदेखि उपेक्षित अवस्थामा रहँदा नेपाल लोकतान्त्रिक खेलकुद संघ, पर्साले प्रेस विज्ञप्ति जारी गर्दै बृहत् आन्दोलनको चेतावनी दिएको छ।
संघका अध्यक्ष श्याम पटेलद्वारा जारी गरिएको विज्ञप्तिमा उल्लेख गरिएअनुसार, वि.सं. २०३८ सालमा स्थापना भएको नारायणी रंगशाला करिब १५,००० देखि १८,००० दर्शक क्षमता रहेको मुलुकको प्रमुख रंगशाला हो। तर दशरथ रंगशालापछि दोस्रो ठूलो मानिने यो पूर्वाधार दशकौँदेखि जीर्णोद्धारको प्रतीक्षामा रहेको जनाइएको छ।
वि.सं. २०७७ मा रु. ७ करोड बजेट विनियोजन गरिए पनि त्यसपछि निर्माणकार्य रोकिएको, र पछिल्लो संघीय बजेट २०८२/८३ मा समेत वीरगन्जको नारायणी रंगशालालाई पूर्ण रूपमा उपेक्षा गरिएकोप्रति विज्ञप्तिमा कडा आपत्ति जनाइएको छ।
विज्ञप्तिमा भनिएको छ, “काठमाडौंका मुलपानी, कीर्तिपुर, मोरङ, कैलाली, रुपन्देही, झापा र सुर्खेतका रंगशालाका लागि बजेट विनियोजन भए पनि वीरगन्जको नारायणी रंगशालालाई निरन्तर बेवास्ता गरिनु निन्दनीय छ।” साथै, पर्साबाट तीनजना संघीय मन्त्री रहेकाबेला पनि यसप्रकारको बेवास्ताले स्थानिय गौरव, खेलकुदको सम्मान र युवा पुस्ताको भविष्यमाथि गम्भीर अन्याय भएको भन्दै संघले गहिरो चिन्ता व्यक्त गरेको छ।
अध्यक्ष पटेलले भनेका छन्, “खेलकुद पूर्वाधारको संरक्षण र स्थानीय खेलाडीको भविष्य सुनिश्चित गर्न अब मौन बस्ने होइन, सबै खेलकर्मी, प्रशिक्षक, खेलप्रेमी र नागरिकहरू एकजुट भएर बृहत् आन्दोलनमा उत्रिनुको विकल्प छैन।”
उनले नारायणी रंगशालालाई प्राथमिकतामा राखेर छिटोभन्दा छिटो जीर्णोद्धार कार्य सुरु गर्न सरकार र सरोकारवाला निकायलाई आग्रह समेत गरेका छन्।
प्रेस विज्ञप्तिमार्फत लोकतान्त्रिक खेलकुद संघले नारायणी रंगशालाको संरक्षण, स्तरोन्नति र समावेशी विकास सुनिश्चित नभए शान्तिपूर्ण तर दृढ आन्दोलन प्रारम्भ गरिने चेतावनी दिएको छ।