रौतहट । रौतहटको फतुवा विजयपुर नगरपालिका–४ निवासी ४२ वर्षीय अनुठा राय यादवको सशस्त्र प्रहरीको मोटरसाइकल ठक्करबाट मृत्यु भएको एक महिना नाघिसक्दा पनि पीडित परिवारले न राहत पाएका छन्, न क्षतिपूर्ति।
आतबार आयोजित पत्रकार सम्मेलनमा मृतकका परिवारजन तथा स्थानीय सामाजिक अगुवाहरूले घटनामा संलग्न दोषीलाई कारबाही गर्न सुरक्षा निकाय उदासीन देखिएको आरोप लगाए। उनीहरूका अनुसार प्रहरी र सरकारी वकिलको मिलेमतोमा मुद्दा दबाउन खोजिएको छ।
गत वैशाख २४ गते सशस्त्र प्रहरी बल बेस क्याम्प दुधियाभारमा कार्यरत हवल्दार सुवास सिंहले चिनी तस्करको पछ्याइमा प्रयोग गरेको भारतीय नम्बर प्लेटको मोटरसाइकल बीआर-३०-७९३६ ले ठक्कर दिँदा अनुठा राय गम्भीर घाइते भएका थिए। उपचारका लागि वीरगन्जस्थित गण्डक अस्पताल लगिएकोमा केही दिनमै उनको मृत्यु भयो।
मोटरसाइकलमा सवार राम जिनिस साह पनि घाइते भएका थिए। हाल उनी अस्पतालबाट फर्किए पनि बैशाखीको सहारामा हिँडिरहेका छन्।
मृतकका परिवारले इलाका प्रहरी कार्यालय गरुडामा उजुरी दर्ता गराए पनि अहिलेसम्म दोषीमाथि कारबाही भएको छैन, न त कुनै क्षतिपूर्ति वा क्रियाखर्च प्रदान गरिएको छ। मृतकका छोरा राजेश यादवका अनुसार, सुरुमा नेताहरूले क्षतिपूर्ति दिलाउने आश्वासन दिए पनि पछि सम्पर्कविहीन भएका छन्।
ईलाका प्रहरी कार्यालय गरुडाका प्रमुख डीएसपी राजन कार्कीका अनुसार, घटनाका मुख्य दोषी फतुवा विजयपुर–४ का अर्जुन उर्फ गोपाल बैठा हुन् र उनी फरार छन्। हवल्दार सुवास सिंहसमेत अभियुक्त रहेको तर अनुसन्धान जारी रहेको कार्कीले बताए।तर प्रत्यक्षदर्शीहरू र घाइते राम जिनिस साहले भने दुर्घटनाको जिम्मेवारी सुवास सिंहकै रहेको दाबी गरेका छन्। उनीहरूका अनुसार, अस्पतालमा प्रहरीहरूद्वारा जबरजस्ती अर्को व्यक्तिको नाममा दोष सार्न दवाव दिइएको थियो। साभार – रातोपाटी