बिरगंज, ४ असार — पर्सा जिल्लाको अमरपटी नाकाबाट केही समय रोकिएको भारतिय कुखुराको चल्लाको तस्करी पुनः सुरु भएको छ। एक महिनादेखि बन्द रहेको तस्करी सुरक्षाकर्मी र सम्बन्धित निकायबीचको मिलेमतोमा फेरि सञ्चालनमा आएको हो।
स्रोतका अनुसार सशस्त्र प्रहरीको घुमुवा टोलीले उच्च अधिकारीको नाममा मासिक रकम लिएर भारतिय चल्लाको ओसारपसारमा सहजीकरण गरिरहेको छ। अमरपटीकै स्थानीय स्वरुप र सन्दीप नामका व्यापारीहरूले अमरपटी नाका हुँदै चल्ला नेपाल भित्र्याइरहेका छन्। तस्करीमा नेपाल प्रहरी र पशु क्वारेन्टाइन कार्यालय समेत मौन देखिएका छन्।
यस्ता चल्लाहरू पर्साका विभिन्न पोल्ट्री फार्ममा पुर्‍याइँदै आएको छ। केही हप्ता अघि मात्र सशस्त्र प्रहरीले बिन्दवासिनी क्षेत्रबाट ७,५०० अवैध चल्ला नियन्त्रणमा लिई नष्ट गरेको थियो। तर अहिले सोही निकायका केही व्यक्ति आर्थिक लाभको लोभमा तस्करहरूसँग मिलेर काम गरिरहेका छन्।
यो गतिविधिले जनस्वास्थ्यमा जोखिम र स्थानीय कुखुरा व्यवसायमा अन्यायपूर्ण दबाब सिर्जना गरेको छ। सम्बन्धित निकायको गम्भीर ध्यान जानु आवश्यक छ।