बारा ४ असार — जिल्लाको कलैया उप-महानगरपालिका वडा नं. १४ बघवन टोलमा पुरानो रिसीवीको कारण एक व्यक्तिको कुटपिट गरी हत्या गरिएको घटना सार्वजनिक भएको छ। ५० वर्षीय नन्दु राउत कुर्मीलाई २०८२ साल जेठ २९ गते बेलुका करिब ६:१५ बजेको समयमा उमेश जैसवालसहित ६ जनाको समूहले मिलेर मरणासन्न हुने गरी कुटपिट गरेका थिए।
गम्भीर घाइते अवस्थामै कुर्मीलाई उपचारका लागि तत्काल प्रादेशिक अस्पताल कलैयामा लगिएको भए पनि, चिकित्सकले उनलाई सोही दिन साँझ ७:२० बजे मृत घोषणा गरेका थिए।
घटनाको जानकारी प्राप्त हुनासाथ जिल्ला प्रहरी कार्यालय, बाराबाट प्रहरी टोली खटिएको थियो। प्रारम्भिक अनुसन्धानपछि सो घटनामा संलग्न एक जना आरोपी २८ वर्षीय दिगम्बर साह कलवारलाई सोही दिन नै पक्राउ गरियो। उनलाई बारा जिल्ला अदालतबाट ७ दिनको म्याद लिएर ज्यानसम्बन्धी कसूर अन्तर्गत थप अनुसन्धान अघि बढाइएको छ।
त्यसैगरी, बाँकी फरार रहेका आरोपितहरुको खोजी गर्ने क्रममा प्रहरी निरीक्षक खेम प्रसाद नेपालको कमाण्डमा खटिएको विशेष टोलीले अन्य तीन जनालाई विभिन्न स्थानबाट पक्राउ गरेको छ।
पक्राउ परेका व्यक्तिहरू निम्नानुसार छन्:
१. कलैया उपमहानगरपालिका–१४ निवासी ३८ वर्षीया रन्जु जैसवाल (उमेश जैसवालकी श्रीमती)
२. उमेश जैसवालका छोरा, २० वर्षीय सुमित जैसवाल
३. उमेश जैसवालकै अर्का छोरा, १८ वर्षीय सुजित कुमार जैसवाल
उनीहरूलाई क्रमशः कलैया वडा नं. ५ स्थित सागर लामिछानेको घर र पर्सा जिल्लाको वीरगंज महानगरपालिका वडा नं. १ स्थित बसिर मियाँको घरमा लुकीछिपी बसेको अवस्थामा प्रहरीले पक्राउ गरेको हो।
पक्राउ परेकामाथि बारा जिल्ला अदालतबाट म्याद थप गराई अनुसन्धान जारी राखिएको प्रहरीले जानकारी दिएको छ। अन्य फरार रहेका आरोपितहरुको खोजी कार्य अझै पनि तीव्र रुपमा भइरहेको छ।