पर्सा, ९ असार ।
मधेस प्रदेशका मुख्यमन्त्री सतिशकुमार सिंहले पर्सा जिल्लाको ड्राइपोर्ट–परवानीपुर सडकखण्डमा सोमबार आकस्मिक अनुगमन गर्दै अवैध रूपमा भारतीय सवारीसाधनहरूमाथि जबर्जस्ती कर असुल्दै आएका ३ जनालाई रंगेहात पक्राउ गराएका छन्।

मुख्यमन्त्री सिंह जनगुनासो सुनेपछि आफैँ टोलीसहित सडकमा ओर्लिएका थिए। छड्के निरीक्षणका क्रममा विभिन्न अस्थायी ढाटमार्फत अनधिकृत रूपमा कर उठाइरहेका तीन जनालाई नियन्त्रणमा लिइएको हो। पक्राउ परेकाहरूलाई जिल्ला प्रहरी कार्यालय, पर्सामा बुझाइएको छ भने घटनाबारे अनुसन्धान जारी रहेको प्रहरीले जनाएको छ। यद्यपि, अहिलेसम्म उनीहरूको विस्तृत विवरण सार्वजनिक गरिएको छैन।

मुख्यमन्त्री सिंहले घटनापछि प्रतिक्रिया दिँदै भने, “जनताको गुनासो सुनिन्थ्यो, आज प्रत्यक्ष देखियो। अब अवैध असुली, बलजफ्ती कर र सीमापार सवारीसाधनमाथिको दुर्व्यवहार सह्य हुने छैन।”

यस घटनाले पर्सा प्रहरी प्रशासन र जिल्ला प्रशासन कार्यालयको भूमिकामाथि गम्भीर प्रश्न उठाएको छ। नागरिकहरूको गुनासोका अनुसार, ड्राइपोर्टदेखि परवानीपुरसम्मको सडकमा विगतदेखि नै अनधिकृत असुली हुँदै आएको थियो।

विशेष गरी जगरनाथपुर चोकस्थित कबाडी कर असुल्ने ढाटले भारतिय सवारीसाधनहरूलाई धम्क्याएर रकम असुल्ने गरेको उजुरीहरू आएका थिए। यद्यपि, ती ढाटहरूसँग भारतीय सवारीसाधनसँग कर उठाउने अधिकार नै छैन।

आइसिपी नजिकै रहेको अर्को ढाटबाट भने ३५० नेपाली रुपैयाँको साटो ३५० भारतीय रुपैयाँ जबर्जस्ती असुल्ने गरिएको भारतीय मालवाहक चालकहरूले गुनासो गरेका छन्।

सार्वजनिक रूपमा बारम्बार उजुरी आइरहँदा पनि पर्सा प्रहरी र प्रशासनको निष्क्रियता र मौनता आफैँमा शंकास्पद देखिएको छ।
अब नागरिक अपेक्षा राख्दै छन् – मुख्यमन्त्रीको यो कडा कदम पछि सम्बन्धित निकायले जिम्मेवारीपूर्वक कदम चाल्नेछ।