१६ असार, कलैया, बारा ।

मधेश प्रदेशको सीमावर्ती जिल्ला बाराबाट व्यापक तस्करी मौलाएको खबर छ । जिल्ला प्रहरी प्रमुख एसपी सन्तोष तामाङको प्रत्यक्ष निर्देशनमा उनका घुमुवा इन्स्पेक्टर खेम नेपालले तस्करीको लाइन मिलाउने गरेको स्रोतको भनाई छ ।
इन्स्पेक्टर नेपाल जिल्ला प्रहरीको प्रशासन हेर्ने इन्चार्ज भएपनि सबै उठ्तीपुठ्ती धन्दाको र्याकेट उनैले चलाउने गरेको प्रहरी स्रोतको भनाई छ । एसपी तामाङको विश्वास पात्र प्रहरी अधिकृतका हैसियतमा उनले हबल्दार घनश्याम पाण्डेलाई असुलीमा पठाउने गरेका छन् । बारा आएको करिब ३ महिनामै उनले तस्करहरूसँग बाक्लो हिमचिम बढाएका छन् । विगतमा रसुवा हुँदा सुन काण्ड लागेर जेलदेखि निलम्बनसम्म परेका इन्स्पेक्टर नेपालको चुरीफुरी बारामा हेर्न लायकका भएको बताइएको छ ।
बारा पर्सामा लामो समयदेखि घुमुवा रहेका वरिष्ठ सई विनोद काफ्ले र इन्स्पेक्टर खेम नेपालको टकरावपछि पुराना घुमुवा सई काफ्ले साइड लागेका छन् साथै उनको सम्पूर्ण टीम नै लाखापाखा लागेको छ । यही मेसोमा इन्स्पेक्टर खेम नेपालको चुरीफुरी बढेको प्रहरी स्रोतको भनाई छ । उनले बदनाम हबल्दार घनश्याम पाण्डेलाई आफ्नो हुलाकी बनाएर चौकी, ईप्रका र तस्करबाट पैसा असुल्ने जिम्मा लगाएका छन् । एसपी तामाङले हरेक प्रहरी युनिटलाई ३० देखि एक लाखसम्म मासिक बुझाउने उर्दी जारी गरेको स्रोतको भनाई छ ।
आफ्नो खर्चपर्च अलग्गै उठाउने बानी लागेका हबल्दार पाण्डेले १ असारदेखि चौकी चौकी र ईप्रकाबाट तोकिएको रकम उठाउन जाने जिम्मा पाएका हुन् । हालै मात्र काठमाडौंबाट सरुवा मिलाएर गएका एक जना सहायक हबल्दार अनि जवानलाई पनि त्यस्तो मासिक रकम मातहतबाट रिसिभ गर्ने जिम्मा पाएको बताइएको छ । बारामा १३ वटा सीमा प्रहरी चौकी छन् भने कुल ५८ वटा प्रहरीका विभिन्न युनिटहरू छन् ।
एसपी तामाङको निर्देशन र इन्स्पेक्टर खेम नेपालको सेटिङमा यही हप्तादेखि मुर्सवा नाकाबाट ठूलो मात्रामा तस्करी लाइन खुलाउने प्रक्रिया थालिएको समाचार स्रोतको दावी छ । यस नाकाको प्रहरी प्रशासन मिलाउने ठेक्का शम्भु नामक कुख्यात तस्करले लिएको दावी गरिएको छ । उसले नेपाल प्रहरी १० लाख, सशस्त्र प्रहरी ६ लाख र सिडिओ ५ लाखका दरले महिनावारी बुझाउने ठेक्का लिएर विभिन्न स-साना व्यापारी एवं तस्करलाई लाइन बाँड्ने गरेको स्रोतको भनाई छ ।
यस्तै अहिले प्रहरी चौकी पर्सौनी, सिम्रोनगढ, बरियातपुर र कबईगोठबाट ठुलो तस्करी भइरहेको स्रोतले बताएको छ । कबईगोठबाट सियाराम कुशहवाको सेटिङमा सुरेन्दर नामक एक जना पुराना तस्करले अखाद्य माछा, मन्दिर वा पुजामा चढाईने फूल तथा किराना सामान ट्याक्टर र पिकअपबाट ओर्साने गरेका छन् भने नेपालबाट भारत तर्फ गैरकानुनी रुपमा कवाड निकासी गरिरहेका छन् । उनीहरुले नेपाल प्रहरीलाई १० लाख, सिडिओलाई ५ लाख र सशस्त्र प्रहरीलाई ७ लाखका दरले मासिक बुझाउने ठेक्का लिएको दावी स्रोतको छ ।
कसरी कसिलो भयो एसपी र इन्स्पेक्टरको गाठो
२०७६ साल फागुनमा सीमा प्रहरी चौकी टिमुरेका इन्चार्ज प्रहरी निरीक्षक खेमप्रसाद नेपाल सुन काण्डमा निलम्बनमा परेका थिए । चीनको केरुङबाट नेपाल आउँदै गरेको ना ६ ख ४९३२ नं को कन्टेनर चेकजाँच गर्ने क्रममा २०७६ पुस ११ गते चालक फुर्वा पासाङको साथबाट ४२२ ग्राम सुन लिई चालकलाई छोडेको र उक्त सुन आवश्यक कानूनी प्रकृयाको लागि सम्बन्धित निकायमा बुझाउनु पर्नेमा नबुझाएको अभियोगमा इन्स्पेक्टर नेपालमाथि कारबाही भएको थियो । तत्कालीन समयमा उनलाई निलम्बन गर्दै छानविन गरिएको थियो । सोही अभियोगमा इन्सपेक्टर नेपाल केही समय जेल समेत बसेका थिए । हाल बारा प्रमुखका रुपमा एसपी रहेका सन्तोष तामाङ सो बेला रसुवा जिल्लाको प्रहरी प्रमुख डीएसपीका रुपमा कार्यरत थिए । सोही बेलादेखिको खान्तेपिन्ते दोस्ती अहिले बारामा जमेको हो ।
त्यतिबेला निलम्बनमा परेकाहरूमा प्रहरी निरीक्षक खेमप्रसाद नेपाल, प्रहरी नायव निरीक्षक भोज बहादुर सेन वली, प्रहरी सहायक निरीक्षक रामशरण कुमाल, प्रहरी हवल्दारहरू रामशरण रिमाल, पुरुषोत्तम खत्री, रामकाजी लामा, गोपी बहादुर लो तामाङ रहेका थिए । त्यस्तै प्रहरी जवान शिवनारायण चौधरी, युवराज खरेल, भविलाल रुम्बा लामा, रामचन्द्र वि.क.,रिता चौधरी, मनोज आले, छेक्यु डोल्मा मोक्तान र तारा बहादुर प्रजा गरी १५ जना कारबाहीमा परेका थिए । ०७६ सालमा रसुवा सुन तस्करीको प्रमुख हव बनेको थियो । किलोका किलो सुन केरुङ नाका हुँदै रसुवा भित्रिने र काठमाडौं हुँदै तराईका जिल्ला भएर भारततर्फ जाने गरेको थियो । त्यही दोस्ती र सेटिङ अहिले बारा प्रहरीमा हुन थालेको भन्दै बाराका प्रहरीहरू बीच चर्चा हुने गरेको छ ।
प्रशासन हेर्ने इन्स्पेक्टर खेम नेपाल “जेठ महिनाको उत्कृष्ट प्रहरी घोषित !
शान्ति सुरक्षा, अपराध अनुसन्धान र राजस्व संकलनमा उल्लेखनीय योगदान पु¥याएको भन्दै जिल्ला प्रहरी कार्यालय बारामा कार्यरत प्रहरी निरीक्षक खेम नेपाललाई हालै “जेठ महिनाको उत्कृष्ट प्रहरी घोषित गरिएको छ । जिल्ला प्रहरी कार्यालय बाराले हरेक महिना मातहतका प्रहरी कर्मचारीलाई प्रोत्साहन र मनोबल बढाउने उद्देश्यले थालिएको उत्कृष्ट प्रहरी घोषित गर्ने काम पनि आजकल “काम गर्ने कालु मकै खाने भालु” उक्तिमा परिणत भएको भन्दै बाराका प्रहरीहरू बीच व्यङ्ग हुने गरेको छ ।
किनकी नेपाल न त कुनै इप्रका वा चौकीको प्रमुख छन् न त अपराध अनुसन्धान गर्ने जिम्मेवारीमा नै छन् । प्रहरी स्रोतका अनुसार उनी त बाहिरबाट हेर्दा जिल्लाको प्रशासन हेर्ने अर्थात् मोलतोल गरेर तल्ला प्रहरी कर्मचारीहरूलाई चौकी इन्चार्ज र मातहत खटाउने हर्ताकर्ता हुन् । तर भित्री धन्दा भने एसपी तामाङको निर्देशनमा तस्करीको सेटिङ मिलाएर असुली धन्दा गर्ने घुमुवा इन्चार्ज हुन् । साभार – नेपाल बहस