बारा, असार १८ — बाराको कलैया उपमहानगरपालिका–१० मटिअर्वामा एक व्यक्तिले घरायसी विवादका क्रममा आफ्नै श्रीमतीको हत्या गरेका छन्। हत्या अभियुक्त बच्चा मियाँ लाइ प्रहरीले नियन्त्रणमा लिएको छ।
जिल्ला प्रहरी कार्यालय बाराका अनुसार मियाँले आफ्नी २३ वर्षीया श्रीमती सहिना खातुनलाई पारिवारिक झगडापछि घरभित्रै कुटपिट गरी मासु काट्ने धारिलो दाबले टाउको र घाँटीमा आक्रमण गरेका थिए। घटनास्थलमै खातुनको मृत्यु भएको पुष्टि भएको छ।
घटना मिति २०८२ साल असार १८ गते दिउँसो करिब ३:१५ बजे भएको बताइएको छ। घटनाको खबर प्राप्त हुनासाथ प्रहरी चौकी मटिअर्वा र जिल्ला प्रहरी कार्यालय बाराबाट खटिएको टोलीले तत्कालै घटनास्थल पुगेर प्रारम्भिक अनुसन्धानपछि आरोपी मियाँलाई पक्राउ गरेको हो। साथै, हत्या गर्न प्रयोग गरिएको दाब पनि प्रहरीले बरामद गरेको छ।प्रहरीका अनुसार घटनाबारे थप अनुसन्धान भइरहेको छ।








