कलैया । बाराका बिभिन्न नाकाहरुबाट सशस्त्र प्रहरीको संलग्नतामा दैनिक लाखौं रुपैयाँ बराबरको तस्करी भइरहेको छ ।
सशस्त्र प्रहरी बल पिपरपाती र बिओपी गोलागञ्ज नाकाबाट अरबिन्द, भोला, दीपक, जयगुरु, संदिप, मास्टर, नजुदिनलाई तस्करीको लाइन दिइएको छ । पिपरपाती गुल्मका गल्मपति डिएसपी राजनलाल श्रेष्ठले सेटिङ मिलेपछि तस्करीको लाइन दिएको आरोप छ ।
त्यस्तै पिपरपातीकै मातहतमा रहेको कबही गोठ नाकाबाट फुल(फ्लावर), माछाको काम गर्ने शम्भु, सुरेन्द्र, सियाराम लगायत साना ठूला गरी २ दर्जन भन्दा बढी ब्यापारीले भारतबाट भन्सारछली तस्करी गर्दैआएका छन् ।
बाराको अर्को महत्वपूर्ण मटिअर्वा गुल्मको गुल्मपति डिएसपी उदयराज न्यौपाने छन् । उनले मटिअर्वा गुल्मको मातहतमा पर्ने बरैनिया बीओपीबाट बारा जिल्ला उद्योग बाणिज्य संघका उपाध्यक्ष प्रदीप साह((गोल्डेन तस्करीको नाम) लाई ट्रयाक्टरमै रातभरि चिनी ल्याउने छुट दिएका छन् । यसै नाकाबाट सुरेन्द्र साहले समेत चिनी तस्करी गर्दैआएका छन् । मटिअर्वाबाटै बीरेन्द्रको ग्रुपले दैनिक २०–२२ वटा बाइकमा किराना समानको तस्करी गर्दैआएको छ । तर सशस्त्र प्रहरीले देखेको नदेख्यै गरिरहेको छ ।
सशस्त्र प्रहरी १२ नम्बर गणका एसपी खुमबहादुर केसीले जितपुर बेसमा कार्यरत आफ्ना बिश्वासपात्र अमृत द्विवेदीलाई घुमुवाको रुपमा सादा पोशाकमा परिचालन गर्दै आएका छन् । उनी ८–९ बर्ष पहिले पनि घुुमुवाका रुपमा बसेको र सबै आईडिया भएकै कारण एसपी केसीले उनलाई खटाएका छन् ।
ब्राजिलियन मकै (स्वीट कर्न) तेस्रो मुलुकबाट नेपाल ल्याएर मधेश र लुम्बिनी प्रदेशका सीमानाकाबाट भारत तस्करी हुने गरेको छ । उक्त मकै बाराको प्रसौनीमा भण्डारण गरी मुसहर्वा हुँदै भारतको रक्सौल लैजाने गरेको छ ।
यी नाकाबाट तस्करीको गुरुयोजना बनाउने र तस्करसँग सेटिङ मिलाउने काम भने पर्साको प्रबिधिक तालिम शिक्षालय पथलैयामा कार्यरत हवल्दार राजीब यादवले गर्दैआएका छन् । मधेश प्रदेशका ८ वटै जिल्ला हेर्ने गरी घुमुवाको काम सशस्त्र प्रहरी बलको मुख्यालयका डीएसपी सुदिप रेग्मीले खटाएको भन्ने गर्दछन् ।
त्यसो त बारामा घुमुवाका रुपमा मुख्यालयबाट खटिएका हवल्दार सन्तोष यादव र सुनिल यादवले कपडा बरामद गरेको भिडियो मिडियामा आएपछि उनीहरुलाई सशस्त्रको मधेश प्रदेश छिन्नमस्ता बाहिनीमा तानेर छानबिन भइरहेको छ ।
सन्तोष यादवले ३ वटा र सुनिलले २ वटा मोवाइलमार्फत् ब्यापारीसँग कनेक्सन गरी तस्करीको लाइन चलाएर लाभ लिएको प्रारम्भिक छानबिनका क्रममा खुलेको बताइएको छ । झापा दरबन्दी भएका सर्लाहीका घुमुवा रोशन मिश्रलाई भने अहिले पनि यथावत नै राखिएको छ । सशस्त्रका वर्तमान आईजीपी राजु अर्यालको रनर भएकाले आफूलाई कसैले हल्लाउन नसक्ने भन्दै उनी निर्धक्क सीमाबाट तस्करीको लाइन दिएर लाभ लिन तल्लीन छन् ।साभार – नेपाल फेस