वीरगञ्ज, १ साउन ।

बाल सुधार गृह पर्सामा कार्यरत चौकीदारले कैदीहरूसँग दबाब र प्रभाव प्रयोग गरी करिब १० लाख १५ हजार रुपैयाँभन्दा बढी रकम ठगी गरेको खुलासा भएको छ।
जिल्ला सिराहा लाहान नगरपालिका–३ निवासी २४ वर्षीय प्रमानन्द गुप्ता, जो बाल सुधार गृह पर्सामा चौकीदारको हैसियतमा कार्यरत थिए, उनीमाथि लागु औषध सम्बन्धी मुद्दामा सजाय पाएका कैदीहरूलाई आर्थिक रुपमा ठग्ने काम गरेको आरोप लागेको हो।
उनले १० जना कैदीहरूसँग नगद तथा ईसेवा मार्फत गरेर कुल रु. १०,१५,३७०।– (दश लाख पन्ध्र हजार तीन सय सत्तरी रुपैयाँ) असुलेको प्रहरी अनुसन्धानबाट खुलेको छ।
२०८२ साल असार ३२ गते कैद अवधि पूरा गरी छुट्ने तयारीमा रहेको गुप्ताविरुद्ध पीडित कैदीहरूले बाल सुधार गृह प्रशासन तथा प्रहरी कार्यालयमा उजुरी दिएका थिए। उजुरीका आधारमा जिल्ला प्रहरी कार्यालय पर्साले तत्काल कारबाही गर्दै उनलाई नियन्त्रणमा लिएको छ।
प्रहरीका अनुसार गुप्तामाथि ठगी, आपराधिक विश्वासघात तथा आपराधिक लाभ (Extortion) सम्बन्धी कसूरमा म्याद थप गरी थप अनुसन्धान भइरहेको पर्सा प्रहरी प्रवक्ता तथा सूचना अधिकारी किशोर लम्सालले जानकारी दिए ।