वीरगञ्ज, २ साउन ।
पर्सा जिल्लाको प्रमुख सहर वीरगञ्जस्थित मुख्य बसपार्क क्षेत्र यतिबेला यौन व्यवसाय र मानव तस्करीको खुला अखडाको रूपमा परिणत हुँदै गएको छ। यात्रुको भीडभाड रहने यो संवेदनशील क्षेत्रमा खुलेआम भइरहेको आपराधिक गतिविधिप्रति सुरक्षा निकायहरूको भूमिकामाथि गम्भीर प्रश्न उठ्न थालेको छ।
स्थानीय स्रोतहरूका अनुसार, बसपार्क आसपासका होटल, खाजा घर, र साना छाप्रा संरचनाहरूमा रातको समयमा यौन व्यवसाय चल्ने गरेको छ, जुन प्रायः प्रहरीकै जानकारीमा हुने बताइन्छ। कतिपय स्थानहरूमा त प्रहरीकै मिलेमतोमा यस्तो गैरकानुनी कार्य सञ्चालन हुँदै आएको आरोप समेत लागेको छ।

बसपार्क एरिया र बाइपास छेत्रमा हुने देह ब्यापार बारे प्रहरी चौकी बसपार्कले खासै चासो नदिएको स्थानीय बताउछ्न । प्रहरीकै मिलोमतो हुन सक्ने आमसर्बसाधारणको बुझाइ रहेको छ ।
एक स्थानीय होटल व्यवसायीले नाम गोप्य राख्ने सर्तमा बताएअनुसार, “राति ९ बजेपछि प्रभु हस्पिटल जाने बाटो र बाईपास क्षेत्रमा यस्ता गतिविधि खुलेआम सञ्चालन हुन्छन्।” उनका अनुसार, केही होटलहरूमा प्रहरीको संरक्षणमा नै यौनधन्दा चलिरहेको देखिन्छ।
स्रोतहरूका अनुसार, यस्ता आपराधिक गतिविधिमा भारतका सीमावर्ती क्षेत्रहरूबाट युवतीहरू ल्याइन्छन् भने नेपालकै दुर्गम क्षेत्रका विपन्न परिवारका महिला तथा किशोरीहरूलाई प्रलोभन देखाएर, कहिलेकाहीँ जबरजस्ती पनि, यौनधन्दामा संलग्न गराइन्छ।
नेपाल सरकारद्वारा लागू गरिएको मानव बेचबिखन तथा ओसारपसार (नियन्त्रण तथा सजाय) ऐन, २०६४ अनुसार जबरजस्ती यौनधन्दामा लगाउनु वा त्यसको व्यापार गर्नु गम्भीर आपराधिक कार्य मानिन्छ। तर व्यवहारमा हेर्दा यस्तो गैरकानुनी धन्दा नियन्त्रणभन्दा बाहिर गएको देखिन्छ।
प्रहरी प्रशासन भने यस विषयमा मौनजस्तै देखिन्छ। जनताको सुरक्षाका लागि खटिनुपर्ने प्रहरी निकायमाथि नै संलग्नताको आशंका लाग्नु गम्भीर विषय हो। स्थानीय सुरक्षा संयन्त्र प्रभावकारी भएको भए यस्ता क्रियाकलापहरू यति निर्भीक ढंगले सञ्चालन हुने थिएनन्।
स्रोतहरूका दाबी अनुसार, बसपार्कस्थित प्रहरी चौकीका इन्चार्ज सइ धिरेन्द्र थपलिया र घुमुवा जवान जगनारायण पटेलको प्रत्यक्ष संलग्नतामा रातिको समयमा यौन व्यवसाय सञ्चालन हुने गरेको हो। उनीहरूबाटै संरक्षण र सूचना चुहावट हुने गरेको स्थानीयहरू आरोप लगाउँछन्।
सामाजिक, कानुनी र नैतिक मूल्यहरू उल्लंघन गर्दै फैलिंदो यस्तो आपराधिक प्रवृत्ति नियन्त्रण गर्न अब ढिलाइ गर्नु हुँदैन। प्रहरी प्रशासनले निष्पक्षता देखाउँदै दोषीमाथि कडा कारबाही गर्नु आवश्यक छ। साथै, स्थानीय तहदेखि संघीय सरकारसम्मको समन्वयमा साझा पहल आवश्यक छ, ताकि बसपार्क क्षेत्र पुनः सुरक्षित र मर्यादित वातावरणमा फर्काउन सकियोस्।