सर्लाही ।

सर्लाहीको ब्रहम्पुरी चौकीका ईन्चार्ज मनोज यादवविरुद्ध फैलाइएको अडियो लिक प्रकरणबारे प्रहरीले स्पष्ट प्रतिक्रिया दिँदै उक्त अडियोमा कुनै आपराधिक वा शंकास्पद कुरा नरहेको बताएको छ । अडियोमा न पैसा मागेको कुरा छ, न त तस्कर वा तस्करीसम्बन्धी कुनै कुरा गरिएको छ ।
अडियोमा महिलाले घरायसी सामानको विषयमा कुरा गर्दा यादवले आफूलाई त्यसबारे थाहा नभएको र छानबिन गर्नेमात्र भनेको स्पष्ट सुन्न सकिन्छ । तर, यही सामान्य संवादलाई केही व्यक्तिहरूले तोडमोड गरी चरित्रहत्या गर्ने उद्देश्यले प्रचारबाजी गरेको प्रहरीको भनाइ छ ।
जिल्ला प्रहरी कार्यालय सर्लाहीका सूचना अधिकारी एवं प्रहरी नायब उपरीक्षक (डिएसपी) सरोज राईका अनुसार अडियो सामाजिक संजालमा बाहिरीएपछि मनोज यादवलाई जिल्ला प्रहरी कार्यालय सर्लाहीमा बोलाएर घटनाका सम्बन्धमा बुझिएको र घटना संजालमा भनिएको जस्तो नरहेको पाइएको छ ।
प्रहरी प्रशासनले सत्यतथ्य नबुझी अफवाह फैलाउनेहरूमाथि आवश्यक कानुनी कारबाही गरिने चेतावनी दिएको छ । मनोज यादव स्वयं पनि आफूविरुद्ध गरिएको असत्य आरोपबारे कानुनी प्रक्रिया अघि बढाउने तयारीमा रहेको जनाइएको छ ।