बारा, साउन ८ ।
नेपाल सरकारले मधेश प्रदेशसहित बारा जिल्लालाई आगामी तीन महिनाका लागि संकटग्रस्त क्षेत्र घोषणा गरेको छ। लगातारको लामो समयसम्म वर्षा नहुनुका कारण उत्पन्न खरबारी, खडेरी र खानेपानीको अभाव जस्ता संकटपूर्ण अवस्थालाई मध्यनजर गर्दै यस्तो निर्णय लिइएको हो।
यस सन्दर्भमा जिल्ला प्रशासन कार्यालय, बाराले आज साउन ८ गते बिहीवार दिनको ४ बजे एक आपतकालीन बैठकको आयोजना गरेको छ। बारा जिल्लाका सबै सरकारी कार्यालय प्रमुखहरूलाई स्पष्ट कार्ययोजना सहित अनिवार्य रुपमा बैठकमा उपस्थित हुन आग्रह गरिएको छ।
प्रमुख जिल्ला अधिकारीको नेतृत्वमा हुने उक्त बैठकमा नीति, योजना र राहतका कार्यक्रमहरू प्रभावकारी ढंगले सञ्चालन गर्न समन्वयात्मक कार्ययोजना निर्माण गरिने जनाइएको छ। बैठक जिल्ला प्रशासन कार्यालयको सभाहलमा हुने जानकारी दिइएको छ।
जिल्ला प्रशासन कार्यालयले सबै सरोकारवाला निकायहरूसँग सहकार्य गर्दै संकटको समयमा जनताको समस्यालाई कम गर्न द्रुत, समन्वित र प्रभावकारी हस्तक्षेप गर्न तयारी थालेको जनाएको छ।