पर्सा, वीरगञ्ज ।
पर्सा जिल्लाको वीरगञ्ज महानगरपालिका–१ स्थित छपकैया क्षेत्र हुँदै ठूलो मात्रामा भन्सार छलि गरेर तस्करी भइरहेको खुलेको छ। सीमावर्ती भारतीय सहर रक्सौलबाट भारतको घरेलु तथा ब्राण्डेड कपडा, काजु, किसमिसलगायतका महँगा सामग्रीहरू नेपाल भित्र्याइँदै आएको स्थानीय स्रोतले जनाएको छ।
तस्करहरूले छपकैया लचका घाट क्षेत्रलाई मुख्य मार्ग बनाएर सामान भित्र्याइरहेका छन् भने प्रहरीकै मिलेमतोमा ती सामानहरू वीरगञ्ज हुँदै देशका विभिन्न भागमा पठाइएको पाइएको छ।
विशेषगरि छपकैया–पन्टोका मार्ग हुँदै सवारी साधन वा हिँडेरै तस्करहरू भन्सार नतिरी सामान ल्याउने क्रम तीव्र रुपमा बढेको छ। स्थानीय ट्रान्सपोर्ट व्यवसायीहरूमार्फत ती सामानहरू देशका प्रमुख सहरहरूमा आपूर्ति भइरहेको छ।
स्रोतका अनुसार, यस तस्करीमा स्थानीय प्रहरी युनिटकै संलग्नता देखिएको छ। सशस्त्र प्रहरी बल पर्साले केही दिनअघि मात्र छपकैया क्षेत्रबाट करिब २० लाख रुपैयाँ बराबरको अवैध भारतीय कपडा बरामद गरेको थियो।
तर, बरामदपश्चात केही समयको मौनतापछि ती तस्करहरू पुनः सक्रिय भएका छन्। हालै पर्सामा नयाँ जिम्मेवारी सम्हालेका सशस्त्र प्रहरीका एसपीले भने यस्ता गैरकानुनी कार्यमा संलग्नहरूलाई नछोड्ने स्पष्ट चेतावनी दिएका छन्।
एसपीको भनाइ:
“सिमावर्ती क्षेत्रमा हुने कुनै पनि अवैध गतिविधि सहन सकिँदैन। कानून विपरीत कार्यमा संलग्न जोकोही भए पनि कडा निगरानी र कारबाही हुनेछ,” सशस्त्र प्रहरी पर्साका एसपीले बताए।
स्थानीयबासीहरूले पनि बारम्बार यस विषयमा प्रहरी प्रशासनलाई जानकारी गराउँदै आए पनि ठोस कार्यवाहीको अपेक्षा गरिएको छ।
अब हेर्न बाँकी छ — सशस्त्र प्रहरीका नयाँ एसपीले तस्करीमाथि रोक लगाउने कति सकसाथ कदम चाल्छन्, र, प्रहरी प्रशासन आफैंको संलग्नता भएका घटनाहरूमा पारदर्शिता देखाउँछन् कि देखाउँदैनन्?