वीरगञ्ज, पर्सा ।
भारतसँग टाँसिएको वीरगञ्ज महानगरपालिका–१७ स्थित अलौ नाकाबाट तस्करीको धन्दा खुलेआम चलिरहेको खुलासा भएको छ । ड्राइपोर्ट प्रहरी चौकीबाट खटिएका घुमुवा प्रहरी सुबोध साह र सरोज यादवको सेटिङमा दैनिक रूपमा खाद्यान्न, लत्ता–कपडा, काजु–किसमिस, इलेक्ट्रोनिक पार्टपुर्जा, हार्डवेयर लगायतका सामग्री भारतबाट नेपाल भित्र्याइँदै आएको छ ।

त्यसैगरी, नेपालबाट भारततर्फ कबाड ओसारपसारसमेत ती घुमुवा प्रहरीकै संरक्षणमा सहज रूपमा भइरहेको स्रोतले जनाएको छ । तस्करी नियन्त्रण गर्नु पर्ने सशस्त्र प्रहरी र नेपाल प्रहरीले नै तस्करहरूसँग साँठगाँठ गरी उल्टै तस्करीलाई प्रोत्साहन दिएको देखिन्छ ।

स्थानीय व्यापारीका अनुसार, साना व्यवसायीहरूले साइकल र मोटरसाइकलमार्फत सामान ल्याउँदा पनि उनीहरूबाट महिनावारी रूपमा घुमुवा प्रहरीले प्रती साइकल मोटरसाइकल सङ तीन हजारका दरले रुपैयाँसम्म असुल्ने गरेका छन् । तस्करी नियन्त्रणभन्दा मासिक असुली नै प्राथमिकतामा परेको आरोप स्थानीयले लगाएका छन् ।

अहिले अलौ नाकाबाट तस्करी यति व्यापक भएको छ कि ‘मासिक सेटिङ’ बिना सामान ओसारपसार सम्भव छैन । प्रहरी प्रशासनले यस्तो अवैध धन्दामा संलग्न प्रहरीमाथि कारवाही नगरेसम्म तस्करी नियन्त्रण असम्भव देखिन्छ ।

स्थानीयबासी र व्यापारीहरूले यसबारे जिल्ला प्रहरी कार्यालय पर्सा तथा सशस्त्र प्रहरी बलको ध्यानाकर्षण गराएका छन् ।