वीरगञ्ज, साउन १३ ।
पर्सा जिल्लाको वीरगञ्ज महानगरपालिका अन्तर्गत पावर हाउस चोकबाट एकजना मानसिक रुपमा कमजोर अवस्थामा भेटिएका अन्दाजी ३५ वर्षीय बेवारिसे पुरुषलाई आज दिउँसो १२:४५ बजे मानवसेवा आश्रम वीरगञ्ज शाखाले उद्धार गरेको छ।
उद्धार गरिएको व्यक्ति आफ्नो नाम, ठेगाना तथा व्यक्तिगत विवरण प्रष्ट रूपमा बताउन सक्ने अवस्थामा थिएनन्। मानवताको सेवामा समर्पित मानवसेवा आश्रम वीरगञ्जले तत्काल उनलाई उद्धार गरी आश्रममा सुरक्षितरूपमा राखेको हो।
आश्रममा लगेपछि उहाँको सरसफाइ, नुहाइ–धुवाइ गराइएपछि स्वास्थ्य जाँच तथा औषधोपचारको प्रक्रिया सुरु गरिएको आश्रमका संस्थापक देवेश गुप्ताले जानकारी दिनुभयो। मानसिक तथा शारीरिक स्वास्थ्यको अवस्था मूल्याङ्कन गर्न डाक्टर भरत गोइतको निगरानीमा औषधोपचार सुरु गरिएको छ।
उद्धार कार्यमा मानवसेवा आश्रमका अभिभावक तथा समाजसेवी प्रकाश थारुको सक्रिय पहल रहेको थियो भने वडा प्रहरी कार्यालय श्रीपुरका बरिष्ठ हवल्दार दिनेश यादव र स्थानीय समाजसेवीहरुको समेत सक्रिय सहयोग रहेको थियो।
मानवसेवा आश्रम वीरगञ्ज शाखाले लामो समयदेखि वीरगञ्ज क्षेत्रका सडकमा बेवारिसे अवस्थामा रहेका व्यक्तिहरुको उद्धार, संरक्षण, स्वास्थ्य उपचार तथा पुर्नस्थापनाको कार्य गर्दै आएको छ। यो उद्धार कार्य समाजमा मानवता र सेवाभावको ज्वलन्त उदाहरण हो।