बारा १४ साउन ।
जिल्ला प्रहरी कार्यालय बाराको अपराध अनुसन्धान शाखाका इन्चार्ज प्रहरी निरीक्षक खेम नेपालले बारा जिल्लाभित्र तस्करी, हुण्डी, र अन्य आपराधिक क्रियाकलापमा संलग्न समूहहरूसँग मिलेमतो गरी लाखौं रुपैयाँको अवैध असुली गरिरहेको खुलासा भएको छ।
जिल्ला प्रहरी कार्यालय बाराका प्रहरी प्रमुख एसपी सन्तोष तामाङको ग्रीन सिग्नल पाएपछि क्राइम शाखाका इन्चार्ज प्रहरी निरीक्षक खेम नेपालले बारा जिल्ला बाट तस्करी खुलाएको एक प्रहरी अधिकृतले बताए । स्थानीय स्रोतहरूका अनुसार, बाराको मटिअर्वा, मुसहर्वा, बलिरामपुर, कवही गोठ र सिम्रौनगढ नाकाबाट दैनिक रूपमा भन्सार नतिरी नेपाल भित्र्याइने वस्तुहरू — जस्तै भारतीय कपडा, दाल–चिनी, हार्डवेयर पार्टपुर्जा, इलेक्ट्रोनिक सामग्री, कुखुराको चल्ला, गाई–भैंसी, र आन्द्र प्रदेशबाट ल्याइने विषाक्त माछा —प्रहरी निरीक्षक नेपालकै संरक्षणमा सञ्चालन हुँदै आएको छ।
उक्त तस्करीका कारोबारीहरूबाट निरीक्षक नेपालले आफ्ना घुमुवामार्फत महिनावारी ‘सेटिङ रकम’ असुल्ने कार्य गर्दै आएको जनगुनासो बढ्दो छ।
पोष्टिङमा घुस, आफ्नालाई चौकी!
प्रहरी निरीक्षक नेपालमाथि संगठनभित्रै भेदभाव र आर्थिक लेनदेनका आधारमा पोष्टिङ गर्ने आरोप पनि लाग्दै आएको छ। निकट प्रहरी कर्मचारीहरूलाई सीमावर्ती महत्त्वपूर्ण चौकीहरूमा पठाउने र अन्यलाई पाखा लगाउने कार्य निरन्तर भइरहेको प्रहरी वृत्त भित्रकै स्रोतहरू बताउँछन्।
उनीमाथि प्रहरी जवान र हवल्दारलाई पोष्टिङका लागि रकम माग्ने, नदिने कर्मचारीलाई हटाउने जस्ता कार्य गरेको प्रमाणहरू समेत संगठनभित्र गुनासोका रूपमा सुनिन थालेका छन्।

सुनकाण्डका निलम्बित अधिकृत, फेरि विवादमा
खेम नेपाल बिगतमा सुनकाण्डमा संलग्न रही निलम्बनमा परेका प्रहरी अधिकृत हुन्। त्यसपछि पुनः संवेदनशील जिम्मेवारीमा फर्किनु र अहिले फेरि त्यही शैलीमा तस्करी र भ्रष्टाचारको संरक्षण गर्नु नेपाल प्रहरीको संस्थागत मर्यादामाथि गम्भीर प्रश्न उठाउने विषय बनेको छ।
जब प्रहरीजस्तो संवेदनशील जिम्मेवारीमा बसेका अधिकृतहरू नै तस्करी र भ्रष्टाचारको संरक्षक बन्छन्, त्यहाँ न त सुरक्षा हुन्छ, न सुशासन। यस्ता व्यक्तिहरूलाई ढाकछोप होइन, तुरुन्त कारवाही गर्नु आजको आवश्यकता हो।