पर्सा, साउन १८ ।
पर्सा जिल्लाको जिराभवानी गाउँपालिका वडा नं. ५ शंकरसरैयामा घरायसी विवादका कारण श्रीमतीको हत्या गर्ने एक जना व्यक्ति पक्राउ परेका छन्।
३२ वर्षीय जितेन्द्र माझी मुसहरले मादक पदार्थ सेवन गरी आफ्नी २४ वर्षीया श्रीमती असपतलीया देवी मुसहरलाई हात मुक्का र लठ्ठीले प्रहार गरी घाँटी समेतमा चोट पुर्‍याउँदै कर्तव्य गरी मारेको पर्सा प्रहरीले जनाएको छ।
उक्त घटना साउन १७ गते साँझ करिब ६:३० बजे घटेको हो। घटनाको जानकारी पाएलगत्तै अस्थायी प्रहरी पोष्ट शंकरसरैयाको टोली घटनास्थलमा पुगेर प्रतिवादी माझीलाई नियन्त्रणमा लिएको थियो।
इलाका प्रहरी कार्यालय पटेर्वासुगौलीबाट सोको (SoCo) सहितको टोली घटनास्थलमा खटिएर प्रमाण संकलन, शवको मुचुल्का लगायत कानुनी प्रक्रिया पुरा गरेको तथा शव पोष्टमार्टमको लागि नारायणी अस्पताल वीरगञ्ज पठाइएको पर्सा प्रहरीले जानकारी दिएको छ।
पक्राउ परेका माझीलाई पर्सा जिल्ला अदालतबाट ७ दिनको म्याद थप अनुमति लिएर ज्यान सम्बन्धी कसूरअन्तर्गत थप अनुसन्धान भइरहेको प्रहरीले जनाएको छ।