वीरगंज, पर्सा २० श्रावण ।
सशस्त्र प्रहरी बल नेपाल नं. १३ गण हे. पर्साका प्रहरी उपरीक्षक (एसपी) पुरन चन्द भट्ट र सशस्त्र प्रहरी निरीक्षक (ड्राइपोर्ट) सुरेन्द्र राज खड्काले वीरगंजस्थित मानवसेवा आश्रमको अवलोकन भ्रमण गरेका छन्। सामाजिक उत्तरदायित्व वहन गर्ने उद्देश्यले गरिएको उक्त भ्रमणमा उनीहरूले बिहानको भोजन सेवामा समेत सक्रिय सहभागिता जनाएका थिए।
भ्रमणको क्रममा एसपी भट्ट र निरीक्षक खड्काले आश्रममा बसोबास गरिरहेका वृद्धवृद्धा, अपांग तथा असहाय व्यक्तिहरूसँग आत्मीयता पूर्वक समय बिताए। उनीहरूले मानवसेवाको उच्च मूल्याङ्कन गर्दै आगामी दिनमा व्यक्तिगत र संस्थागत रूपमै सहयोग गर्ने प्रतिबद्धता समेत व्यक्त गरे।
मानवता, सेवा र सद्भावनाको भावनाले प्रेरित यो सहभागिताले सुरक्षाकर्मीहरू सामाजिक क्षेत्रमा पनि सक्रिय भूमिका खेल्न सक्ने उदाहरण प्रस्तुत गरेको छ। कार्यक्रममा सहभागीहरूले यस प्रकारको सहयोग भावी दिनमा निरन्तर रहनुपर्ने आवश्यकता औंल्याएका थिए।
कार्यक्रमको अवसरमा मानवसेवा आश्रम वीरगंजका संस्थापक सदस्य देवेश गुप्ता, ओम कुमार झा, संयोजक मुना मगर पुलामी, प्रदुमन सर्राफ, पवन कलवार, आयुष गिरीलगायत सामाजिक व्यक्तित्वहरूको पनि सक्रिय उपस्थिति रहेको थियो।
मानवसेवा आश्रमका तर्फबाट आगन्तुक पाहुनाहरूलाई धन्यवाद ज्ञापन गर्दै संस्थाले समाजका असहाय वर्गहरूका लागि गरिरहेको सेवामा अझ सशक्त साथको अपेक्षा राखेको बताइएको छ।