बिरगंज २९ श्रावण ।
बिरगंज भन्सार क्षेत्रमा खटिएका सशस्त्र प्रहरीले सर्वसाधारणले भारतबाट किनेर ल्याएका घरायसी सामान नियन्त्रणमा लिई जफत गर्ने तर तस्करीको माल सामान भने बिना चेकजाँच छाड्ने गरेको खुलेको छ।
स्रोतका अनुसार सशस्त्र प्रहरीको मिलेमतोमा बिरगंज भन्सार हुँदै आएका अटोमा भारतीय कपडा भन्सार छल्दै बिरगंज बसपार्क हुँदै हेटौंडा र नारायणघाटतर्फ पठाइने गरेको प्रमाणसहितको भिडियो प्राप्त भएको छ। हिजो बुधबार (२८ गते) दिउँसो १:४५ बजे बिरगंज बसपार्क क्षेत्रमा भन्सार छली गरी ल्याइएका भारतीय कपडाहरु इभि गाडीमा लोड भइरहेको दृश्य कैद गरिएको हो।
उक्त कार्यमा बिरगंज बसपार्क चौकीका सई धिरेन्द्र थपलिया र उनका घुमुवा प्रहरी जगनारायण पटेलको संलग्नता रहेको बुझिएको छ। रातदिन इभि, टाटा सुमो र रात्री बसमार्फत यी कपडाहरु हेटौंडा, नारायणघाट, पोखरा र काठमाडौंजस्ता ठूला सहरमा पठाइने गरेको छ।
घुमुवा पटेलले तस्करहरुसँग महिनावारी फिक्स गरी करिब एक दर्जन कारोबारीलाई बिरगंज बसपार्कमार्ग हुँदै भारतीय कपडा सहजै पठाउन सहयोग गर्दै आएको आरोप लागेको छ। यसबारे सम्बन्धित निकायको ध्यानाकर्षण आवश्यक रहेको सरोकारवालाहरुको भनाइ छ।