बिरगंज ६ भाद्रा । इजरायलमा हमास आतङ्ककारी आक्रमणपछि अपहृत नेपाली विद्यार्थी विपिन जोशीको तत्काल रिहाइका लागि विश्व हिन्दु परिषद्, नेपालले नेपाल सरकारलाई जोडदार माग गरेको छ।

परिषद्ले प्रधानमन्त्री तथा मन्त्रिपरिषद् कार्यालयमार्फत जिल्ला प्रशासन कार्यालय पर्सालाई बुझाएको ज्ञापनपत्रमा जोशीको जीवनरक्षाका लागि गम्भीर चासो व्यक्त गर्दै छिटोभन्दा छिटो कूटनीतिक प्रयास अघि बढाउन सरकारलाई अनुरोध गरिएको छ।

जोशीको तत्काल सुरक्षित रिहाइका लागि अन्तर्राष्ट्रिय स्तरमा उच्च प्राथमिकताका साथ कूटनीतिक पहल गर्न। मित्र राष्ट्र, अन्तर्राष्ट्रिय समुदाय र सम्बन्धित सरोकारवालासँग तत्काल समन्वय गरेर जोशीलाई सुरक्षित रूपमा नेपाल फर्काउने वातावरण निर्माण गर्न। विदेशमा अध्ययन, रोजगारी वा अन्य प्रयोजनमा रहेका सम्पूर्ण नेपाली नागरिकको दीर्घकालीन सुरक्षाका लागि ठोस राष्ट्रिय नीति र कार्ययोजना बनाउन। अपहरणकारी समूहसँग नेपाली नागरिकको रिहाइ सुनिश्चित गर्न नेपाल सरकारले आवश्यकताअनुसार विशेष दूत नियुक्त गरी प्रत्यक्ष वार्ता र अन्तर्राष्ट्रिय दबाब सिर्जना गर्न।

गत अक्टोबर ७ मा हमास आतङ्ककारी आक्रमणपछि इजरायलस्थित किबुत्ज नाहल ओजबाट नेपाली विद्यार्थी जोशी बेपत्ता भएका थिए। उक्त आक्रमणमा १० जना नेपाली विद्यार्थीले ज्यान गुमाएका थिए भने जोशी अहिलेसम्म सम्पर्कविहीन अवस्थामा छन्।

परिषद्ले जोशीको दीर्घ बेपत्ता अवस्थाले नेपाल र नेपाली जनतामा मात्र नभई सम्पूर्ण मानवतावादी समुदायमा गहिरो पीडा र चिन्ता पैदा गरेको जनाएको छ।

ज्ञापनपत्रमा भनिएको छ, “विपिन जोशीको तत्काल रिहाइका लागि नेपाल सरकारले अन्तर्राष्ट्रिय स्तरमा उच्च प्राथमिकताका साथ जोडदार कूटनीतिक पहल गर्नुपर्छ। साथै मित्रराष्ट्र, अन्तर्राष्ट्रिय समुदाय तथा सम्बन्धित सरोकारवालासँग सहकार्य गरेर सुरक्षित वातावरणमा उनलाई मातृभूमि नेपाल फर्काउने व्यवस्था मिलाउन आवश्यक छ।”

परिषद्ले नेपाल सरकारलाई आफ्ना नागरिकको सुरक्षाप्रति संवेदनशील बन्नुपर्नेमा पनि जोड दिएको छ। परिषद्ले प्रधानमन्त्री तथा मन्त्रिपरिषद् कार्यालयमार्फत जिल्ला प्रशासन कार्यालय, पर्सालाई बुझाएको ज्ञापनपत्रमा नेपाल सरकारले कूटनीतिक, राजनीतिक र मानवीय सबै तहमा पहल गर्नुपर्नेमा जोड दिइएको छ।

गत ७ अक्टोबर २०२३ मा भएको आक्रमणपछि बेपत्ता जोशी अझैसम्म इजरायली भूमिमा कैद अवस्थामा रहेको बताइएको छ। उक्त घटनामा १० जना नेपाली विद्यार्थीले ज्यान गुमाएका थिए भने जोशीको अवस्थाबारे अहिलेसम्म निश्चित जानकारी छैन।

परिषद्ले आफ्नो विज्ञप्तिमा हालै माइतीघर मण्डलामा भएको प्रदर्शनमा समेत नेपालीहरूले विपिनको रिहाइ माग गर्दै आवाज उठाएको उल्लेख गरेको छ। ज्ञापनपत्रमा भनिएको छ– “विपिन जोशीको विषयमा जनतामा गहिरो पीडा, चिन्ता र संवेदनशीलता रहेको छ। सरकारको उच्च अपेक्षा अनुसार अबिलम्ब ठोस पहल आवश्यक छ।”

परिषद्का अनुसार, नेपाल सरकारले प्रभावकारी पहल गरे मात्रै एक नेपाली आमाको आँसु पुछ्न सकिने र सम्पूर्ण राष्ट्रले राहतको सास फेर्ने अवस्था आउनेछ।