पर्सा, ११ भदौ ।
सशस्त्र प्रहरी बल, नेपाल नं. १३ गण हे.क्वा. पर्सा अन्तर्गत प्रस्तावित सीमा सुरक्षा गुल्म वीरगंज र वीरगंज भन्सार कार्यालय पर्साबाट खटिएको संयुक्त टोलीले भारतबाट भन्सार छली गरी ल्याइएका सामान नियन्त्रणमा लिएको छ ।
वीरगंज महानगरपालिका–१० अशोक बाटिका स्थित सिता थापाको घरमा भण्डारण गरी राखिएको अफजल डबल एपल फ्लेभर, कपडा र किराना सामान सहित भन्सार मुल्य रु. १७,८५,७३६ बराबरको मालसामान तथा सो कार्यमा प्रयोग गरिएको BR 22 S 0701 नम्बरको भारतीय मोटरसाइकल (मुल्याङ्कन रु. १,४०,०००) समेत नियन्त्रणमा लिइएको सशस्त्र प्रहरीले जनाएको छ ।
नियन्त्रणमा लिइएका सामान र सवारीसाधन गरी जम्मा रु. १९,२५,७३६ बराबरको मालसामान आवश्यक कारबाहीका लागि वीरगंज भन्सार कार्यालय पर्सामा बुझाइएको सशस्त्र प्रहरी पर्साका सूचना अधिकारी सशस्त्र प्रहरी नायव उपरिक्षक सुरज कार्कीले जानकारी दिनुभयो ।