वीरगञ्ज — पर्सा जिल्लाको वीरगञ्ज महानगरपालिका–१६ शंकराचार्य गेटस्थित सडकखण्डमा प्रहरीले मानव बेचबिखनमा संलग्न एक जनालाई पक्राउ गरेको छ। शनिबार साँझ ७ बजे तिर प्रहरी चौकी ईनर्वाबाट खटिएको टोलीले नेपालबाट भारततर्फ जाँदै गरेका एक पुरुष र एक युवतीलाई चेकिङको क्रममा रोकेर सोधपुछ गर्दा गतिविधि शंकास्पद पाइएपछि थप अनुसन्धानका लागि दुवैजनालाई नियन्त्रणमा लिइएको हो।

जिल्ला प्रहरी कार्यालय पर्साका अनुसार प्रारम्भिक अनुसन्धानमा ती युवतीलाई भारततर्फ कपडा कारखानामा राम्रो आम्दानी हुने भन्दै प्रलोभनमा पारी लैजाँदै गरेको खुलासा भएको छ। पक्राउ परेका व्यक्ति सिन्धुपाल्चोक जिल्लाको चौतारा साँगाचोकगढी नगरपालिका वडा नं. १ निवासी २९ वर्षीय सुजन लामा (उर्फ पासाङ तामाङ) रहेका छन्।

प्रहरीका अनुसार लामा युवतीलाई वीरगञ्ज हुँदै भारततर्फ लैजाँदै थिए। घटनाबारे जानकारी गराएपछि पीडित युवतीका आफन्त र नेपाल सरकारका सम्बन्धित निकायका प्रतिनिधिको रोहवरमा बयान लिइएको थियो। त्यसपछि सुजन लामालाई मानव बेचबिखन तथा ओसारपसार (नियन्त्रण) ऐन, २०६४ बमोजिमको कसूरमा पर्सा जिल्ला अदालतबाट सात दिनको म्याद लिई थप अनुसन्धान थालिएको प्रहरी प्रवक्ता सुवास भट्टले जानकारी दिएका छन्।

प्रहरीले मानव तस्करीमा संलग्न व्यक्तिहरूको पहिचान र संजाल भण्डाफोर गर्न अनुसन्धान जारी रहेको बताएको छ।