
पर्सा, साउन १९ ।
वडा प्रहरी कार्यालय बिर्ताले वीरगञ्ज महानगरपालिका–१६ ईनर्वा गाउँबाट कटुवा पेस्तोलसहित एक जनालाइ पक्राउ गरेको छ।
जिल्ला प्रहरी कार्यालय पर्साको प्रवक्ता तथा सूचना अधिकारी प्रहरी नायव उपरीक्षक किशोर लम्सालका अनुसार एक जना अपरिचित व्यक्ति कटुवा पेस्तोल साथमा लिई सर्वसाधारणलाई डरत्रास देखाउँदै हिँडिरहेको भन्ने विशेष सूचनाका आधारमा आइतबार बेलुका साँझ करिब ६:०० बजे वडा प्रहरी कार्यालय विर्ताबाट खटिएको प्रहरी टोलीले मस्जिद नजिक उक्त शंकास्पद व्यक्तिलाई नियन्त्रणमा लिएको हो।
प्रहरीले कानूनी प्रक्रिया पूरा गरी खानतलासी गर्दा पक्राउ परेका व्यक्तिको साथबाट कटुवा पेस्तोल फेला परेको थियो। पक्राउ पर्ने व्यक्ति जिल्ला पर्सा, विन्दवासिनी गाउँपालिका–५ प्रसौनीभठ्ठा घर भई हाल ससुराली वीरगञ्ज–१६ ईनर्वा गाउँमा बस्दै आएका ४० वर्षीय साहेव खाँ रहेको पुष्टि गरिएको छ।
पक्राउ परेका साहेव खाँलाई हातहतियार सम्बन्धी कसूरमा जिल्ला अदालत पर्साबाट ७ दिनको म्याद थप अनुमति लिई थप अनुसन्धान भइरहेको प्रहरीले जनाएको छ।